Wanderwoche 2024

Die Wanderwoche in Urnäsch fand vom 29. Juni - 6. Juli statt. Der Rückblick von Ursula Bruggmann:

25 Persone fahre is Appezällerland, ds Hotel Krone Urnäsch isch bekannt.
Franz u Sepp heis Gepäck verlade, was hei die Lüt ou alles id Koffere glade.
Am Obe nach em guete Ässe göh d Manne is Bett, die chasch vergässe.

Am 30.06. vom Gontebad der Barfuesswäg unter d Füessli gnoh, s hei alli dräckigi Scheichli übercho.
Derno mit dr Gondle uf e Kronberg ue, dobe gässe u trunke i aller Rueh.

1.Juli mit der Zahnradbahn nach Altstätten gfahre, schöni Hüser u das de scho sit Jahre.
Derno 2 Stunde obsi gloffe, wenn chunnt dä Hirschbärg, alli hoffe.
 Schnäll öppis trinke u de wider go. 1 Stunde abwärts gloffe, d Kraft lot noh.
 Am Abe noch eme feine Ässe si mer no chli zäme gsässe.

Am 2.Juli uf d Schwägalp u 3 Stund gloffe, nume einisch öppis gsoffe.
Es geit über Stock u Stei, mir chöme müed u zfride hei.

Am Mittwuch gots uf e Hoch Kaste, Näbu hets, mir chöi nid braschte.
Zum Glück het me der Bluemegarte gseh u mängisch no es paar Fläcke Schnee.

Am Donsti geits uf d Ebenalp, s Wätter guet, aber chli chalt.
Mit der Gondle geits bärgab, u de z Fuess nach Appenzäll, kes macht schlapp.
Am Obe nach em guete Znacht, het üs e Gruppe Fröid gmacht.
Si hei gjödelet und üs Witze verzellt. Und i der Tracht hei si sich vorgstellt.

U scho isch wider Fritigmorge, mir göh scho gli, grad nach em Zmorge.
Mit Bahn un Bus em Lehmen zue, u de bärguf ufs Ahorn ue.

Äs si wunderbari Tage gsi, mir hoffe, nöchscht Johr gäbs no meh.
Am Samstig d Wanderwuche scho verbi, alli säge, schön isches gsi.
Mir säge Dank der Gruppeleitig u fahre hei, jetz geit es gleitig.